قصيدة المبـــاني
جابك الله من فـراق ضيـق صـدور المبانـي
بيتك اللي من رحلـت وكـل جدرانـه تعانـي
الله العالـم لـو انـك جيـت متأخـر ثوانـي
من عرفتك وانت ضايع من مواني لي موانـي
ضاع عمري بس أحـد بهالليالـي واتحدانـي
ودي أتحمد لك الله بالسلامـة ... مـا مدانـي
دام تدري كـل وجـه غيـر وجـه الله فانـي
كان فيني عيب قلي ... فيني العيـب الفلانـي
لعنبوك ان مت بيدك وش يفكك من خوانـي ؟!
ليه تصغر في عيوني وانـت برقـاب الغوانـي
انت منت اللي عشقته !! انت اكيد انسان ثاني
وين حبك للزعل ... وين العنـاد الأولانـي ؟
وين ذاك اللي ليـا أقبـل مايبـات الا بأمانـي
واحـد جابـه الله بـس يـامـر ويعصـانـي
مابغيـت اطيـح بيـده ليـن ماربـي بلانـي
ذاك بس اللي ليا مـن شفتـه يلخبـط كيانـي
قبل اشوفه أجمع إله أحلى القصايـد والمعانـي
الف مرة قبلـه اعـد القصيـده مـن لسانـي
امدحه وانا ادري انـه لـو تباطانـي نسانـي
من يسوي بس سواتك يالرهيـف الاسمرانـي
من يقص جناح طيرك وانت اعز انسان جانـي
إن تبعتك أتبعك مـن طيبـي وواسـع بطانـي
اقدر انزع ثوب طيبي والبـس ثيـاب الانانـي
وان بغيت اكسب رهاني بأي وقت اكسب رهاني
ابك انا لاشفت خلي حط غيـري فـي مكانـي
خلني داخل حـدودك واجبـر بخاطـر زمانـي
إنتشلني مـن بـرودك لـو تولـع بالمحانـي
تكفى واليا قلت تكفى بيـع خلـق الله عشانـي
جيت مابيك تحقرني جيت ابيـك تعـز شانـي
يعلم الله شفت منـك ومـن غيابـك ماكفانـي
شف غيابك وش يسوي بالصـدور وبالمبانـي
والله إنك لو وصلـت البيـت متأخـر ثوانـي
قبل لا الوحشه تزعزع بيتك الصلـب وتبيـده
ماتحمـل ينتظـر شهريـن وعيونـك بعيـده
ماتشوف إلا بقايا مـن حصـاه ومـن حديـده
وتارك قلبي يولـع مـن وقيـده لـي وقيـده
وانت لا تشبع غياب ولا تخـاف مـن النقيـده
كل ماتوصـل برحلـه ترجـع برحلـه جديـده
يا خي اكسب لك ثواب وخاف ربك في عبيـده
كان هرجي مزعلك في شـي قلـي : لاتعيـده
لـاحزنوا ربعي علي ومت ... شاللي تستفيده ؟
عيب تستسهل طعوني وانـت خابرنـي وليـده
كيف صرت بهالبـرود وهالأحاسيـس البليـده
وين حنية زمـان وفرحـة العمـر الرغيـده ؟
وين رايح اللي ليـا قفـا مايـروح الا فقيـده
الوحيد اللي أخافه غصب وامشي معه "سيـده"
والا انا لو هي بكيفي ... مابغيت اطيـح بيـده
ذاك من نظرة ينشـف دم قلبـي مـن وريـده
وان بقيته ماعرفت اقـول لـي جملـة مفيـده
ولعنبوه ان جيت عنده قمت اخربط بالقصيده !
انطحه وانا اعرفه مجنـون و أفكـاره عنيـده
منهو من الناس غيرك غلطته ترفع رصيـده ؟!
كيف اخاف رماح غيرك وانت طعناتك سديـده
والا انا لا جيت اكيد انسان تدري كيف اكيـده
واقدر اطلع من عذابي والعب بـدورك واجيـده
واخدعك بإحساس كاذب واتحدى مـن يصيـده
والله اني لاتركه واصد واعشـق سيـد سيـده
إكذب فـباقي وعودك واصدق بلحظـة سعيـده
عطني إحساس بوجودك واخذ كل اللـي تريـده
لا تضيع من يدينـي فرصـة العمـر الوحيـده
جيت ابي فزعة ضلوعك من مشاعرك البليـده
كان ماتقـدر تخفـف هـم قلبـي ... لاتزيـده
وأنت تدري كيف كانت صدمة غيابـك شديـده
مالقيت إلا بقايـا مـن حصـاه ومـن حديـده
الكاســـر2020
موضوع: قصيدة المبـــاني للشاعر حامد زيد 
السبت أغسطس 18, 2007 7:17 pm
